【網投】肯捱里數女友娶得過
本帖最後由 bunbun 於 2013-11-3 06:54 編輯肯捱里數女友娶得過
肯同你捱長跑的另一半，應該比肯捱麥記更感動吧！
http://hk.apple.nextmedia.com/sports/art/20131103/18490863
蘋果日報 2013-11-03
開波Kick off ：肯捱里數女友娶得過
馬啟仁
細個時好記得有一首廣告歌，歌詞大概係：「憑一顆堅決心，不畏艱苦決定……揮出一身拼勁，盡力發奮創造前程，So we are the champion! We are the champion!」每次廣告一播我都有起雞皮嘅衝動，因為畫面係一幕幕香港年輕運動員努力拼搏嘅慢鏡頭，十三、四歲時睇到呢啲勵志嘢，個人真係振奮好多。呢個其實係麥記漢堡包嘅廣告，入咗腦所以自細我就認為麥記係健康嘢、正嘢。甚至有次喺灣仔運動場睇見有隊美國大學邀請隊跑得快跳得遠，而Lunch時佢哋竟然一個個喺看台食巨無霸，我直頭當咗個包係大補劑㖭，之後逢親比賽前都專登去番個。
所以最近見到網上潮文慨嘆肯捱麥記嘅女朋友難搵時，我係有啲接受唔到，麥記正嘢嚟喎，點可以用個捱字呀，阿女都不時話要喺麥記開生日會，甜蜜回憶多到呢！
網友呻話共富貴容易，共患難就罕有，其實若果真係要量度另一半係咪可以同甘共苦，最好就係叫埋佢同你一齊跑步，就算渣馬幾火熱都好，始終去跑場步唔係睇場戲咁簡單。唔計本地長跑情侶檔陳家豪同姚潔貞呢啲唔跑唔安樂嘅特殊例子，一般嚟講若果肯二話不說就着上波鞋同你一齊出發嘅另一半，一句講晒肯定係上天對你嘅恩賜，如果你有幸遇到的話，請好好珍惜同晒命，貼多啲相上facebook，啲like係你應得嘅。
運動場上有啲項目可以話係共富貴類別，係一齊happy嘅，打波呀睇波呀都係，旨在一齊開心吓，但相比起捱里數嘅共患難類別運動，之後建立嘅感情就刻骨銘心得多。
前排自己整傷韌帶照完磁力共振，容醫生話畀我知好壞消息各一：好消息係十字韌帶未斷得晒，壞消息係效果同斷晒差唔多！
「咁仲可唔可以跑步呢醫生？」
「可以嘅，兩、三個月後啦！」
「渣馬唔跑冇所謂下年再嚟過囉，咁親子運動會得喇啩？」
「吓，千祈唔好，喺仔女面前個個爹哋媽咪唔衰得，仲易整傷！我上年就係咁喺運動場仆低咗拉傷埋條筋！」容醫生苦笑咁話。
要搵個一齊跑嘅另一半唔容易，但要搵個肯為仔女狂奔嘅父母，原來周街都係！
KEYMAN
now TV主持
不能讚同更多! minibt 發表於 2013-11-3 16:03
不能讚同更多!
肯捱里數女友何處尋? .......肯亞、埃塞俄比亞、中國馬家軍:lol
肯捱Shopping里數女友何處尋? ...... 港女? :lol:shutup:
Just joking!
頁:
[1]
