|
2015年9月27日, 完成網走馬拉松! 時間是 PERSONAL WORST 5 小時 18 分.
出發之前在香港的練習極度不足, 最長 (講出嚟都唔好意思...) 係 14 K. INTERVAL 呀衝圈呢 D 不嬲都無做 (係我懶, 怕辛苦... ), 只係 CORE TRAIN 諗住補一補.
賽事約有二千多人參加, 同日本其他馬拉松一樣, 全馬係絕大多數.
開賽前海外參加者在市內的 ECHO CENTER (似係大會堂連圖書館咁既 BUILDING) 取選手包同俾錢 (全馬 8000 YEN), 都好方便. 由於賽前一晚我入住網走湖莊酒店, 比賽當日坐酒店車 730 出車到起點, 時間都好充裕. 起點安排都 OK , 不過女更衣室是借用了起點處一座入面是和式的建築物, 入屋要取鞋, 去廁所又要換佢入面 TOILET 專用的拖鞋 (仲要係蹲式的 TOILET! 唔... 唔 LIKE). 呢度有少少 LEI HAIR. 當我去完 TOILET 仲有整理下自己裝備, 走人時女廁已經排到 INFINITY 咁長... ... 所以都係早早處理好過遲.
寄完行李上線, 都順. 大會廣播都好周到, 會介紹一下一陣出發先經邊度, 轉去邊... 之類. 仲有公布下全場最大年紀的男女參賽者, 男係89歲, 女係77歲, 真是嘩嘩嘩... ...
9 點準時出發, 之前睇左賽道資料, 頭 5 K 係市內, 平路冇咩問題. 天氣好好, 太陽有些少猛, 有點點熱 (應該有 20 度, 短袖再加 ARM WARMER, 下身長 TIGHT 就剛好). 當我跑到第 4 K 我見到第一個民間的 FOOD TENT, 係食蟹 ... ... 我見到一隻隻蟹腳, 我個心好想過去, 但我又好怕唔夠時間 (因為之後 10K 應該唔係人咁品, 要趕住在 11 點 10 分前過到 "非誠勿擾" 那個能取岬! 所以, 我就唯有忍著淚對蟹 GOOD BYE...
接住第 5 至 15 K 果然係好多上落上落, 第 5 K 開始仲係大會所說的 "激坂" ! 都幾斜仲要向上轉彎咁. 沿路兩邊都有樹, 不過若干段落都好曬 (CAP 帽同太陽眼鏡真係唔慳得), 賽事仲要每 5 K 先有一個水站 (比起東馬呢 D 2, 3 K 就有得飲, 係辛苦少少, 所以我自己帶一枝細水頂一頂), 都幾 CHUR.
到第 14.4 K 就係能取岬, 兜曬成個燈塔先回番, 風都大, 有少少辛苦 (之前 UPS AND DOWNS 左 10 K 真係用了不少精力). 之後再去就一段平路, 再入一段約 2 K 的隧道, 嘩, 隧道唔曬舒服多了!
由隧道出來就係海景為主 (老實, 網走馬拉松的景係幾唔錯, 雖然中間去了荒野無咩人打氣, 但鄉下地方自有一番風味), 平路多不過間唔中有暗斜 (有上有落), 天氣又曬又熱, 有些少辛苦. 到 23 K 左右仲有跑手暈左! 我個心都離一離. 不過不得不讚搞開馬拉松大賽的日本人, 火速地先有單車 AED 人飛車幫手, 跟手無耐就有救護車到場. 雖然我只能路過, 但都希望事主無事.
由於事前在香港的練習量超少, 在 "沒有奇蹟, 只有累積" 的馬拉松賽道上, 到 25, 26 K 我已經覺得自己開始謝謝地... ... 心諗, 死囉, 29K 同 35K 都有 CUT OFF 截人位, 我行的話一定上垃圾車! 於是死頂. 到 29K 去了一個公園, 內設大水站又有野食, 仲有一個無人同我爭的女廁仲要唔係蹲既!!!! (從來都冇試過架, WAKAKA) 心情當堂好起來, 出左公園就開心多了.
30 K 開始, 係意志的考驗, 因為去了能取漁港那邊, 係超...... 超...... 大風, 係北海道以北的秋天海風, 真係唔係人咁品, 唯有死忍跑 只係兩三 K 的路程因為又大又鹹的海風而難了幾倍, 而此時天口亦陰起來, 心想: 唔會咁黑落雨嘛... ...
3X K 之後, 真係開始落雨, 初初只係毛毛雨, 越落越大. 此時路段轉入一段單車徑 (唔係香港咁平, 有上落暗斜咁款), 身邊不少人已經做了步兵, 但當時仲有差不多 10K, 8K先完, 心想如果行真係有排. 再者, 後段落大雨如果行會越來越凍, 一定會凍死, 於是, 頂硬上啦唯有!
到最後 2, 3K 其實大會好好, 在最後一段的花田種了整片向日葵, 仲計好日子滿開曬, 但個天似乎想我完賽得型 D, 竟然以超級大雷雨慶祝我完跑! 於是最後一段我就咁樣衝線... ... 幸不辱命 (限時 6 粒, 差 D 就墮馬)
其實最慘並唔係賽道上發生的事, 而係過完終點的領獎牌, 毛巾, 仲有排隊拎行李, 全部事情都在無遮無擋的地方進行 (係電腦 PRINT CERT 的位置有個 TENT ), 仲要女更衣室係一個漏水的帳幕, 地下濕的! 於是我取回行李後勉力只能換了上身衫 (下身真係無能為力... 帳幕入面情況真係唔 OK), 就走去掛隊諗住坐 FREE SHUTTLE 去番網走巴士總站, 點知條隊好鬼長 (SHUTTLE 轉唔到入來, 因為好多人自駕出車), 寒風刺骨, 加上的都未換曬乾淨衫, 我覺得自己未肺炎都好叻.
最後有工作人員帶我地行另一條路, 走了好一陣先在大路上車, 折騰一番終於回到酒店. 呼~~
今次少少體會就係, 練得太少打天才波只會辛苦自己. 亦感謝自己有 TRAIN CORE, 因為 FEEL 到 30K 打後真係胸背腹 + 四頭 + 小腿幫到手, 否則連個跑姿都崩埋就死得更快.
如果東京馬拉松的難度是 1 星, 網走應該至少係 3 星 (加埋今日晴陰雨雷電風咩都出曬, 應該有 4 星). 如果大家跑悶了大城市的比賽, 網走都可以考慮 (不過網走個市的確係好靜, 好少見人,如果鍾意行街買野的跑友要調節下自己心情). |
|