“東西狂奔” by 夢璃 Inspired by Leila, Michelle, 昀, 玩魚 etc…. 後日就係 “渣打香港馬拉松” 全馬公開報名既日子,作為全港知名度最高既馬拉松賽事,好多有心上全馬既跑手會爭住係報名果日坐係電腦面前報,當然有跑開馬拉松而有心想報既,一早就透過佢地所屬既田總屬會,或者運用“優先報名權” (即係上屆指定時間內完成既跑手) 已經完成報名程序。 以往香港只有兩個全馬既賽事,分別係 “中國沿岸馬拉松”(CCM) 同埋 “渣打馬拉松”(渣馬) ,但係呢個情況係上年開始改寫,事關 “城門河皇者之戰” 加設左 全馬途程,故此而家香港有三場全馬賽事。 早係今年8月中,小弟公開透過facebook諮詢我係12月尾舉行既“城門河皇者之戰” 繼續衛冕半馬組別冠軍,定係挑戰全馬?結果係唔夠24個鐘內有117個like,超過左自己所定既100like就挑戰全馬既界限,順理成章我第三個全馬就“城門河皇者之戰” 。 針對今個賽季既情況,小弟特意搵左幾位係IEd識得既人,組成 “夢璃粉絲後援團” ,除左為我報名參加賽事提供建議外,亦擔當監察既角色,從而令小弟係操練上能夠達到預期既目標。由於距離下個全馬只係剩番3個月多D既時間,我都急不及待要 “儲里數” ,開始備戰既第一個禮拜,果個禮拜既里數已經直接上到70km,單周100km既里數,我相信分分鐘會比我預計更早達標。 講開“儲里數” ,操 “長課” (LSD)就係一個重要既元素,講番我以往備戰全馬果陣,起碼都有3次30km以上既長課, “終極長課” 果次要跑到38km;當然今年備戰全馬真係一個好大考驗,事關今年天氣異常炎熱,如果照用番我上個賽季操“長課” 既路線,恐怕會中暑身亡,故此得到幾位友人既鼓勵下,採取一個全新策略, “東西狂奔” 既概念就因此而誕生。 以往我操 “長課” 都係向南方跑向北方,由於小弟居於東九龍,跑向北面(如西貢、沙田、馬鞍山、大埔) 均需攀山越嶺,雖然途徑呢D路段能夠鍛練到大腿既肌肉,但如果長期以高速跑落斜或者稍不留神,會增加受傷既風險。“東西狂奔” ,顧名思意由東面跑向西面,跑經既路段大多為市區既主要道路,地勢較平坦,但唯一要注意既就一定要係凌晨三、四點出發,跑到去目的地果陣最好就天光冇幾耐,因為如果日間/夜晚跑,車流量多,根本係冇乜可能令個人跑得順。 “東西狂奔” 系列暫定有5回,資料如下: 第1回: 藍田至尖沙咀碼頭 (全長 15.8km) 途徑鯉魚門道、裕民坊、牛頭角、九龍灣、太子道、亞皆老街、窩打老道、彌敦道、柯士甸道、尖東 第2回: 藍田至葵興站 (全長 20.2km) 途徑鯉魚門道、裕民坊、牛頭角、九龍灣、太子道、界限街、長沙灣道、九華徑、荔景山路、葵芳 第3回: 藍田至荃灣西約 第4回:藍田至青衣 第5回(最終回) :藍田至屯門碼頭
|