本帖最後由 JoJoYip 於 2013-6-9 18:32 編輯
小弟現年廿五, 家住九龍, 本性屎忽痕外加三分鐘熱度,目標係長跑長有一改過去 本身小弟自細的頑皮開, 唔鍾意癡家, 所以就有唔同運動,小學乒乓, 初中籃球, 中五減肥日日游水游左一個暑假,高中足球 雖然讀區內名校, 但中五前我都唔讀書,突然間心血來潮唔想衰比人睇就開始讀, 比我好彩升到中六 但好景不常, 放學踢波跑跑下斷左靭帶,半月板碎左, 排期做手術要半年後, 好啦~ 又好似中五咁,讀書係為玩, 咁就比我認認真真讀書希望入大學玩多三年 好彩比我入到, 更開心係唔返學入院做手術居然唔洗拎假,但一入就十日 唔知係我本身身體差定誤服蛋, 做完手術好腫啲骨出血又入多次手術室,但公立醫院排左七日先入到, 當中感覺好似有個鉗夾住膝頭咁痛到爆, 之後第十日先出院,先開始我另一人生 經過隻腳伸唔直, 屈唔到, 物理治療半年後我好返,中間我第一次認真接觸跑步 中學運動會有跑過100, 400, 1500同玩過跳遠,三級跳等, 由於我專搵冷門參加所以都有拎過獎, 哈哈 但長少少, 半個鐘以上咁跑真係未試過,而有測時間同距離居然係醫院的跑步機上, 事後當然發現跑步機同真係跑唔同啦 由於果陣真係好想快啲好返踢返波, 所以好努力, 大學入面的健身室亦日日去操 由於覺得悶, 所以我踩單車機,因為單車機可以睇書, 其他唔得 最後係算好返, 但我亦不再愛自己踢足球,因為身邊朋友知道我受過傷會就住我, 我亦都唔會好似未受傷前咁去到盡下下就住就住, 從此我就無再波踢 單車機上的興趣一直到畢業, 亦完成台灣單車環島遊作為畢業旅行 之後工作一直忙亦遇到一個我好鍾意的女生, 但中間一直有好多少問題,最後亦分手了 為左忘記傷痛, 我決定做運動, 重拾運動流汗為我帶來的快樂 運動最簡單莫過於跑步, 所以就開始跑步 小弟又係一個器材控, 耳筒, 電腦,相機等, 亦深知自己性格係買左就要用盡, 所以不久購入運動手錶連心跳計同測距器,為的就是要自己跑步 開始跑時由於太耐無跑亦唔識控制速度, 跑屋村一圈已經扯晒蝦,大約有千五米左右 亦都唔係日日跑, 可能一個禮拜先跑一次,或兩次 每次加半個圈, 去到後期已經可以跑10K左右 但好景又不常 (應該衰野做太多天收),12年3月我居然盲腸炎, 但我由於見工, 所以第一日無睇,第二日去樓下睇醫生, 可能經過之前手術我變得更忍得痛, 醫生話我急性腸胃炎,到第三日我真係落唔到床先叫白車入院 人生真係充滿驚喜, 上白車想去私家醫院(買左保險無理由唔用), 但救護人員話白車只去公立醫院, 推左去最入個位,床都落唔到, 等左一個鐘聽到叫名抽血, 短短廿米路我行左十五分鐘先過到去,再行左漫長的廿米照X光, 搞左七個鐘先上病房,醫生果陣仲係話我條腸反轉左話未必要做手術 上到病房照電腦掃描, 之後有醫生同我講話:阿仔你大鑊喇, 你盲腸穿左而家要同即刻同你做手術, 夠十八歲未? 唔想屋企人擔心我只係同家姐講, 叫佢地唔好同屋企人講 人生第三次全身麻醉, 唯一擔心係醒唔返,醒唔返好自己唔會知, 好過半身麻醉下半身郁唔到 手術開始前仲講緊笑, 一訓就六個鐘, 好彩最後都醒得返,見到父母的擔心樣, 我又一次做左衰仔 外科病房總結就係人多同嘈, 但亦都見到父母家人最重要,見有病人父母七八十歲行動不便都日日泥探病, 但仔女可能幾日先泥一次,父母果然偉大 一訓就廿日, 放假放左一個月有多,真好唔返工有糧出, 但日日洗傷口洗左兩三個月, 而身上亦多條永不磨滅的疤痕 身體弱, 一直去到年初先跑返步,理由只有一個: 器材控 見到有對鞋好靚, 買左返去, 由於隻色關係基本上唔會著出街,但買左無理由唔著所以就著去跑步 咁耐無跑跑2K已經好辛苦, 但最後跑左5K,跑左一月二月都係亂跑, 日日都跑咁滯, 唔累就買多啲,10K, 累就4K起跳, 10K速度慢慢由開始接近一個鐘去到50分鐘內,亦開始有身邊朋友加入 (其實係佢地等拖拍搵我ZIP時間) 最後興起國外馬拉松的念頭, 希望參加外地賽事順手旅行,感愛下氣氛, 所以上網搵 泥到長跑網同RUNNER’S WORLD先知原來要練其實有更好方法,LSD, TEMOP, INTERVAL等 所以都改變左訓練方法, 唔再一味亂跑 至於體重, 亦由之前70KG減到而家66KG(178CM), 肚啲肥肉都好似少左, 煙都食少左, 希望可以繼續跑 Run Health, Run Long, Run Fast |