|
我有時候覺得「跑」可以令到人放空個腦, 咩都唔諗, 令到自己可以係跑緊果半個鐘、 1 個鐘、 2個鐘完全放低平日既壓力、 負面情緒。
但有時候, 我自己都會覺得放空個腦咁長時候, 會有D悶。我自己就會多D留意下跑道旁既一D趣怪野, 跟住呢, 就會係個心入面為呢D趣怪野作下故仔... 作下作下, 個人就會開心D, 唔覺唔覺又會跑長D! 我有時番到屋企都會將D見到既趣怪野寫番低, 等第時見到再笑下。
例如:
「第一位:
吞雲吐霧女團(共有4名團員)
雖然係女團, 但其實我估佢地係互不相識既。咁點解會以團隊入選呢? 因為呢4位妙齡少艾, 身材娟好, 面目可親, 雖然互不相識(我估), 但係佢地4個用同一個姿態, 一字排開咁坐左係花莆上面。咩姿勢咁吸引到我眼球? 放心, 唔係不雅姿勢。佢地只係不約而同咁翹腳坐, 仲要4個都係右腳翹左係左腳上面, 然之後係左手揸住部iPhone 4/4s, 右手揸住支煙, 低住頭咁係部電話上面劃下劃下。其實, 如果只係得一個女仔咁做呢, 都唔係好特別。不過, 4個唔識既, 一齊用同一個姿勢, 一齊玩iPhone就幾壯觀啦。不過, 吸煙危害健康, 最好都係唔食煙啦。
第二位:
皮褸檸茶俠
其實個名已經講得好清楚啦。今日氣溫21-25度, 濕度95%, 但係呢位哥哥仔, 著住件皮褸(條拉鏈拉到上頸), 長褲係條街到跑步。你以為佢唔正常? 我就話, 其實佢係幾正常既。點解? 因為佢一路跑, 一路仲手揸住盒375檸檬茶黎補充水份。嗱, 你話啦, 跑步識得補充水份, 又點會係唔正常呢? 只不過係, 我地D平凡人淨係識飲水, 最多都係揸住個水樽飲, 無呢個大俠咁創新0者!
再唔係, 我有時真係覺得唔開心/悶啦, 就會換部iPod shuffle既歌 (通常會用D rock D既歌), 換咩呢, 換叮噹呀、 IQ博士呀果D。效果幾好架! |
|