本帖最後由 kenwong 於 2013-12-5 21:36 編輯
今年報2014年全馬唔成功,好失望
不過幸運地都報到半馬,能夠再次參加到一個咁有意義既比賽.
睇返自己原來係網誌寫過一篇有關2013年全馬既報告,竟然冇係長跑網呢度同各位分享 仲有2個月左右就係比賽既日子,希望呢篇文章能夠再次勾起各位對比賽日既回憶未參加過而即將跑第一次既跑友都可以有個心理準備
2013年2月24日
已經係第三年參加,比賽前依然都會有個種緊張同興奮
今年跑全馬挑戰組,起跑時間為0640,我四點已經起身食早餐,再準備一下裝備
出門口時稍稍遲了一點,到尖沙咀時已經0615,交埋行李去埋洗手間已經到左起跑時間
熱身都來不及做,只能較後起跑,下年一定要預早少少.
起步不久見到有位師兄旁邊草叢嘔吐大作,我估佢都不能繼續,心裡面都替佢可惜
今日天氣唔算凍,比較潮濕,未上3號幹線已經出汗,而且因為遲左起步
心理上就想追返前面個批跑手,不自覺加快左步伐,未到5K已經有少少腳痛,
提醒我要收慢,幸好雙腳已經慢慢適應.
上到昂船洲大橋,見到兩條鯊魚跑手,估唔到著住鯊魚裝都跑得比我快,真係佩服,最後我都有幸同佢地一齊過終點@@
10K開始進入狀態,平均6:30/K,17K食第一條powerbar,係度想講下
上年食powerjel,覺得難入口,今年試下powerbar,點知一樣咁難食@@
出左南灣隧道,見到已經跑完青馬同汀九橋比較快既跑手,自己亦都要再加快步伐
20K既步速依然維持到,但係膝蓋開始痛,心理上有少少擔心,不過擔心都多餘
通常我會諗下其他事或者望下四周盡量分散自己注意力,今年水站比去年多左
基本上根本唔需要擔心補給既問題,比起我平時自己操長課,心理上少左壓力
來到30K依然有力,不過痛既感覺越來越強,但係知道仲有10K左右完成到比賽
係度真係要感謝st john既義工,全靠佢地D松節油我雙腳先可以支持到全程@@
到達30K既時間係3:10,比我預算中快左,而且跑緊回程,感覺上會比去程好
沿途既里數指示牌就係我既原動力,好快就入到西隧,氣氛十分好
叫聲打氣聲不斷有,其實參加馬拉松,除左係挑戰自己,惑受個種比賽氣氛都係一件賞心樂事.
出左西隧倒數5K,本來打算一口氣加速,,可惜幾段上鈄後已經消耗我剩餘既體力,雙腳由痛變左麻木
加速不成惟有保持住均速,睇住里數牌38,39,40,41...真係覺得呢幾k好難過,去到銅鑼灣係氣氛最好既一段
如果馬拉松比賽全程跑市區都唔錯,都有市民打氣.
終於來到終點維園,最後同兩條鯊魚跑手一齊到達,之後佢地仲互相擁抱,我都好希望將來既馬拉松都會有朋友同我一齊跑
到終點時間大約為4'20,比去年快20分鐘,下年我要以4小時為目標!
2014再來!
|