|
雷利衛徑長征 - Free 4 篇
本帖最後由 dmy 於 2013-10-28 18:00 編輯
雷利衛徑長征 - Free 4 篇
好耐冇嚟寫後記.
當日STS 試路, 認識了傑仔同benben, 機緣之下同Joe 四個組隊參加. 答應時我放緊假心情輕鬆, 所以冇諗咁多. 今日諗番如果認真考慮之下結果唔知會唔會一樣.
唔記得邊個起個team 名 Free 4, 但成員有:
Lawson (隊長) - 我第一個認識玩ultra 的街坊, 玩山冇咩特別裝備, 永遠背心短褲出塲, SSP 慳家男又EQ 非常好之師兄;
Benson - 思考型, 身型非常fit, 又請我吃魚的師兄;
Runson - 話自己係'跑之子', 跑齡不足一年, 但以全面升呢嘅小師弟;
Watson - 啫係我, 一個唔想跑全馬但無喇喇玩咁長嘅山菜之人.
我哋四個就係四神合體.
一齊組隊參加,除咗佢哋靚仔之外, 最最最最最最最最最最最最重要嘅係佢哋脾氣好, 隨和, 唔緊張時間, 大家共識係要享受過程同開心. 所以成條team 最惡嘅應該係我, 時間食物安排我楂哂主意.
上年我朋友參加, 我由油塘陪行至大埔, 差唔多冇咗半條命. 所以, 我差不多整個夏天嘅準備, 都係咗為咗呢個菜嚟準備嘅. 我冇玩過蟻行, 但覺得尾段打大佬 (其實係打大家姐, 仙姑峰)嘅雷利唔比蟻行易. 夏天多雨, 而我怕濕咗嘅石梯, 可想而知操練時幾辛苦.
喺正式比賽前一個星期我都未捱通頂, 所以比賽前一星期嘅midnight express 我去陪行, 大約知捱通宵要咩準備. 比賽前幾日打點交俾支援的東西和食物安排.
10月26終於嚟到. 天氣涼, 乾爽, perfect weather for 比賽. 出發時狀態唔錯, 因為唔係想谷時間, 所以心情更輕鬆.
夏天練港島時熱到溶咗咁, 成果係天氣涼咗, 就比預算快咗上紫羅蘭山, 而且前面嘅一隊喺紫羅蘭山借我雙杖, 上山更慳力, 但前面仲有咁大段路, 要留力. 比預算快到油塘. Deric 嚟加入陪行. Deric 係超快之人, 我再三叮嚀佢今日係郊遊, 唔好cher 我哋. 我哋食過飯團紅提子就繼續出發. (帶飯團紅提仔嘅朋友話呢隻提子係靚嘢喎...)
去井欄樹呢段路其實係我當日最冇狀態嘅一段, 因為日頭哂住, 辛苦. 終於去到井欄樹, 飲咗冰凍可樂, 真開心. (我平時好少飲汽水, 呢兩個星期我嘅汽水多過我去年總和). 因為大家唔係追時間, 冇人催, 唔知唔覺喺井欄樹留耐咗, 終於隊長做嘢催離開上東洋山.
上東洋山其實都有啲攰, 但比起夏天曬到要拎傘, 真係好好多, 又有風, 好快上到頂再落去沙田坳. 途中見有啲貨車工具唔知啲人做咩, 又見有兩個男人帶住副超坐喺鐡架上睇風景, 我口多, 問佢哋睇乜, 一個答"睇日落" (吓, 咁浪漫?), 另一個答"變型金鋼" (唔知係咪取景), 出電影時大家留意下啦.
去到沙田坳, 會加入陪行嘅靚cat (一身新衣) 同靚M 已經standby, 同我哋照相企埋時, M 話, "嘩你哋真係好臭". 因為感覺到右腳腳趾可能準備起水泡, 靚cat 同靚M 就問checkpoint 入攞bandage, 我就受到女皇式服務. 呵呵. 抵鍚啊. 喺沙田坳出發時 Deric 要交人所以同我哋分道揚鑣, 一直冇跑嘅終於可以用接近光速嘅速度跑落山, 我哋就以歡呼聲同佢告別.
一直有講有笑之下去到大埔道, 我哋dinner 地點. 我一早同隊長講明唔俾我開飯我唔行架! 所以我幾個月前book定我哥嚟做support. 雖然已交帶我哥要點點點, 但係比賽當日再交帶我嫂就真係安心得多 . 食過晚飯, 換埋衫同襪, 比預計留耐咗. 我快五歲嘅姪女豬豬都有嚟, 我哥之前去錯停車場, 所以豬豬見到好多馬騮,佢好驚, 喊埋.... 其實我想話佢知佢姑姐我見到馬騮都好驚, 都想喊.
食飽, 入夜喇, 涼喇, 出發. 本來靚cat 同靚M 喺城門走, 但Lawson 喺孖指徑勁sell 佢哋留耐啲, 所以佢哋陪行至元墩下. 喺城門do 完手帶入完水即走. 平路, 入夜, 見冇聲氣就播歌. 原來要激勵靚cat 有啱聽嘅歌 就okay, 所以一直上铅礦坳我哋過咗好多人. 靚cat 認真起嚟, 唔可講小架.
去到元墩下, 靚cat 同靚M 跳的同我哋sayonara. 我哋就行全條徑最x 悶嘅唔知咩路去太和. 去到太和, feel 到隊友跌watt, 喺7仔留耐啲休息, 見有一隊人馬冇嚟神氣咁休息. 所以佢哋出發時同佢哋講"加油". 商場個洗手間仲開, 太好了.
早上一時三十分, 終於嚟到打二佬呢一關, two cans of coffee 令我好精神, 打二佬喇, 心情少少興奮. 隊中我能力應該最差, 所以我一直行頭. 我一手有杖, 一手借欄杆力上九龍坑山, 差唔多過哂見到嘅隊... 但係冇留意隊友體力, 是我不好... 去到水塘短暫停留, 再上屏風山打大家姐嘅旅程開始冇咁high, 去黃嶺條到好漫長, 隊友跌watt 更明顯... 上八仙之路唔易. 天開始光, 可以收燈.
終於, 星期日嘅06:42, Free 4 整隊人馬齊齊整整登上仙姑峰. 但係, 故事仲唔完.
Runson 膝頭開始痛, 而且企喺度都似瞓著咗. Benson 就比平時更少說話. 南涌, 好似好遙遠咁.
上次pretrip 因天雨關係, 去南涌啲石濕哂, 又入夜, 行到我標冷汗, 面青青, 差唔多全程要 Benson 拖住行. 今次天又光, 地又乾, 雖然我開始跌watt (因為喺仙姑峰上面真係唔想再食嘢), 但我同南涌古道從新建立關係, 做番好朋友. 而可能快到終點, Runson 開始醒同狀態回升.
雷利終點喺馬路底, 去到終點前七分鐘有行過嘅山友話一分鐘就到, 搞到哋high 哂, 但落斜路時諗搞乜呢一分鐘咁鬼耐嘅 (又唔係阿飛正傳). 終於, 嚟到山78公里嘅終點. Free 4 手拖手, 開心過終點.
今日睇番啲相, 除咗Lawson, 過終點之後個樣真係好攰. 但係成條team 人齊齊整整完成, 係好開心嘅.
賽後檢討/感謝之言:
1. 有次同Lawson 購物時, 個老板話佢知玩長途山菜有杖好重要, 我見佢半信半疑... 但係今次唔係用Wilson 借之杖俾我, 我可能已經喺沙田坳到話要退出返屋企.... 而Lawson 用佢對杖又用到好開心, 講到咩好嘅嘢都係因為有對杖, 如個天藍啲係因為佢對杖 ... .... 所以要多謝Wilson.. 不過可唔可以多買一支, 借夠我一對呢? 下次咪一個人玩啦, 同我哋行仲開心.
2. 操練時知道一定要定時進食, 差唔多準時過食藥. 所以今次狀態可以保持.. 但係去到仙姑峰真係唔想食...
3. 多謝各 support 人士. 有support 同冇 support 真係天壤之別. 喺天黑有口熱飯食, 真係唔同. 我哥仲peel 埋橙俾我哋, 哼! 哈! 靚cat 同靚M出現做我貼身侍婢....好感動... 你哋參加山菜我一定嚟support....
4. 最後當然要多謝我隊友, 一齊過咗個比廸士尼更奇妙嘅旅程. 比起阿飛正傳, 我哋仲厲害, 唔止係1 分鐘嘅朋友, 喺23小時36分嘅朋友. 時間唔係好靚, 但係一齊喺預計時間內安全完成, 又享受過程, 我就滿意 (雖然打算嘅老笠同推人落山事件未逹標).
明年唔駛預我喇, 噚晚我喺屋企張床瞓覺我覺得好幸福呀.
(p.s. 補充一句, 張相當然唔係過終點時影架喇, 係去到鰂魚涌時影嘅. 過終點時大家好殘喇.)
相片 copyright @ Willy Yu
|
|