|
K隊訓練6報告:
日期:1/8/2010 (星期日)
出席: 馬拉, WTY, Bolo, 猿球, 大雄
今日既報告好簡單, 因為預算行程只完成咗三份一. 今朝約7:30由tko運動場出發, 大家輕輕鬆鬆沿醫院後山上清水灣道, 當我見到要上斜想行的時候, 發覺馬拉同猿球已跑住上斜, 可能佢哋跑慣4個O, 唔記得咗今次係操山, 上斜要行既. 為咗唔好比佢哋拋離, 唯有跑住死跟. 上到清水灣道既時候, 突然見到有個靚女起架私家車度同我哋揮手, 仲大叫渣油, 睇清楚原來係R嫂, 司機當然係R校長啦, 佢哋正在去大清游水. 大家打完招呼後繼續行程, 但越跑越覺得唔對路, 因為佢哋真係所有斜路都跑晒, 直至去到布袋澳, 估唔到冇咗昌哥起度都要跑到死咁滯.
大家飲咗D水就開始上田下山. 嘩! 雖然個山唔係太高, 但條樓梯都真係好斜, 加上太陽伯伯放晒火, 上到頂之後都覺得有D腳仔軟. 落咗田下山後, 準備上釣魚翁既時候, 好鍾意戲水既馬拉突然話咁鬼曬不如落沙灘突擊R, DESMOND亦贊成, 身為隊長既我, 從未起操山途中中途退出既我, 居然......居然......比佢哋引誘咗落沙灘, 完全冇負到做隊長應負既責任, 同隊員一齊中途走佬去戲水, 我真係愧對我既隊員, 愧對長跑網既師兄師姐, 愧對TKO既市民, 愧對毅行永不放棄既精神........
馬拉, 今次絕對唔係你既錯, 亦都唔係DESMOND既錯, 其實係社會.......唔係社會......係發明比堅尼個D人既錯! 為咗再唔會發生類似既事情, 以後所有男隊員唔准著有泳褲功能既跑褲操山, 另外除咗有生命危險之外, 中途絕不准離隊, 違者罰跑1至10段1次! |
|