|
|
TKO毅行T隊訓練7報告:
日期：T隊:6/8/2010 (星期五) 11:15pm
參加者: (10兄弟) 非比, kf, 牛牛, 明, bolo, rockiec, 狗, 哈利, albert, 大雄
行程及完成時間：
1. 麥３段 北潭凹 - 企嶺下 02:26 (10.2K) 休息 00:15
2. 麥４段 企嶺下 - 基維爾營地 03:55 (12.7K)
3. 麥５段 基維爾營地 - 沙田凹 00:51 (03.0K)
全程 07:27 (25.9k)
報告:
大隊於北潭凹集合後, 各人拉筋熱身準備出發, 突然駛來一部的士, 車上跳下3男1女, 睇佢地既裝束(去街衫, 涼鞋, 斜揹袋), 似開PARTY多過行山, 但當我地問佢地嚟做乜, 佢地竟然話要同我地一樣行麥3-5, 真係估佢地唔到!
影相完畢, 大家興奮地大踏步向山上進發, 因防止有隊員走失, 大家都緊貼著行, 並不斷用1-8的報數方法, 確保人齊. 明明有10個人, 點解用1-8, 因為快腳非比及kf一開始就起前面快放, 消失起漆黑既山林之中, 但我地就用最穩陣唔怕P既方法---全程只急行不跑. 行吓行吓, 8人中帶頭既哈利因想追非比, 所以亦在前面消失咗, 後生仔果然利害. 當過咗章上左轉入林徑之後, 突然見到有電筒迎面照來, 大家以為有另一隊人馬逆走麥徑, 點知睇清楚後發覺係哈利仔, 原來佢比kf同非比放甩咗, 仲走出咗麥徑迷咗路, 走吓走吓逆走緊麥徑都唔知, 比大圍知道佢實好開心, 因為佢終於都搵到同類喇! 好彩佢遇返我地, 如果唔係就走返去北潭凹都未定!
個衰鬼雞公山, 好似上極都上唔完咁, 上到頂既時候真係幾乎連雞公都啼咁滯, 大家都覺得謝謝地, 如果我係山賊, 起雞公山個頂度等水魚一定大有收穫, 因為上到去D人一定冇力反抗, 呀! 針山頂亦係一個好地方. 落到企嶺下, 見到非比同kf摞住兩枝5L裝既水等住我地, 原來佢地只係用咗1:38就到達, 等咗我地成45分鐘, 大家都覺得非常感動, D眼淚起雙眼度lon吓lon吓, 呀!原來係汗嚟就真, 不過起度真係要多謝佢地兩位. 休息補水完畢, 就同兩位神經俠侶(狗哥改既)say goodbye, 狗哥想同非比整個goodbye kiss都趕唔切(我知佢想咗好耐), 因為kf一踏油門架BMW就起馬路既盡頭消失咗, 果然係神經俠侶, 連渣架BMW都好似識輕功咁!
由麥四入口上大金鐘, 大家都可以一氣呵成上到頂, 隊頭同隊尾只相差3分鐘, 由此段到基維爾天色越嚟越清, 可以睇到滿天既星星, 包括有牛郎和織女星, 仙后座, 金牛座, 七姊妹星團等等, 最後仲睇見一彎明月起東面升起, 嘩!真係有披星戴月既feel, 個月亮仲好似跟住我地一齊行咁, 正呀! 但正當大家心裏都講緊'正呀'既時候, rockie卻大叫'死喇', 原來佢扭傷咗隻腳, 唯有負傷慢步前行, 並考慮於梅子林落山離隊. 但後來得到行山杖的幫助, 可以繼續行程, 仲越行越快, 真係估佢唔到. 當就快到基維爾(M92)既時候, 大圍好想發生既事又再發生, 原來佢又多咗3個隊友. 話說去到M92的時候, 大雄接到本來起前面既牛牛既電話, 通知大雄佢同哈利仔及明師兄行咗好耐都唔見D麥徑牌, 可能迷咗路! 於是大雄就叫佢地掉頭走, 希望搵返麥徑, 而大隊則於M92等佢地, 過咗幾個字, 佢地終於起大隊後面出現, 大家匯合後繼續向前進發
到達基維爾時天開始光, 但大家一點倦意都冇, 輕輕鬆鬆咁沿沙田凹道落到沙田凹. 正當大家商討是否繼續去大埔道既時候, 跛咗既rockie居然話隻腳冇事可以行多幾段都冇問題, 但因其中5位隊員(包括兩位隊長)都有要事要離隊, 所以大家決定結束呢次難忘既旅程. 雖然冇完成到預計既全程, 但都能夠體驗到由夜晚行到天光, 跛咗再行返及迷咗再搵返既滋味!
鳴謝:
1. 多謝kf, 非比及狗哥協助大隊於沙田凹及企嶺下埋水.
2. 多謝狗哥沿途協助鴨尾及提供大量小學生零食.
3. 多謝迷咗搵返同跛咗行返既隊員為我地沉悶既旅程增添色彩.
4. 多謝眾隊員既老細雖然好唔願意都肯放人上山.
5. 多謝大圍師兄比咗好多迷咗搵返既經驗我地, 使到我地迷咗都可以保持冷靜.
[ 本帖最後由 大雄2009 於 2010-8-9 03:34 編輯 ] |
|
發表於 2010-8-8 18:37:17
,明智决定離開
,TKO大雄隊長真一流
發表於 2010-8-8 22:00:50
.gif)
...好眼力
.gif)
樓主
今晚返去睇下有無d稍為見得人既post返上黎
