|
本帖最後由 dmy 於 2013-7-16 10:34 編輯
Midnight 逃兵事件簿 0713-0714
Midnight Express 45K Pre Trip 上星期六五點半正式出發, late afternoon 出發喺summer 喺好事, 嗰日又冇乜太陽, 又有風, 開步都舒服. 都知麥第四段難行, 而且有45k 路要走, 所以都想留力, 但大家初期都雄心壯志, 所以第四段中段可以跑嘅路都放一放, 好舒暢. 之後太陽收了, 過一個水澗位右腳又跣咗落水, 好驚易起blister... 冇帶extra襪, 冇計, 焗住跑. 之後大家見到有好多螢火蟲, 大家熄哂燈睇咗一輪, 好鬼靚. 再之後慢長嘅路終於到馬路, 大家加速落去士多食豆腐花. 呢個第四段真係去咗真氣半成, 食番個豆腐花先似番個人.
成成喺個亭留咗水俾我哋, 唔知點解我諗起幼稚園復活節時啲先生收埋啲朱古力蛋等我哋去揾咁... 呵呵...十點半再喺第五段上獅子山段出發, energy level 下降了, 冇人跑, 只有急步. 好在第五段多平路, 大家唱歌提神. 我個speaker 條線可能俾我拉斷咗, 好頹, 第五段冇歌聽. 中途個亭遇另一team 人馬, 兩個半鐘後到大埔道. 第五段尾段落樓梯落教育徑時落到我想死, 上樓梯都冇咁辛苦~!! 其實教育徑條路咁正, 如果喺日頭都可以跑, 但係冇力跑啦.
去到大埔道, 有隊員不適閃咗. 喺大埔道入馬騮徑前大家坐喺地休息一會, 再遇之前山上見到嗰team人, 有個靚女認出我喺美孚zone 人... 哎吔, 希望冇得罪過人... 俾人諗出 @_@ , 下次都係笠住個紙袋操山算 (日頭嘅話又可以防曬).
馬騮徑馬路好焗, 冇之前咁一直有風, 又上斜, 好辛苦. 之後開始山路, 我feel 到我開始跌watt 了, 個山唔高都好辛苦, 腳步唔係好solid. 唉, 都知成成會嚟support, 點解唔一早交支行山杖俾佢, 請佢喺城門拎俾我呢? 不過我又冇拎gel 出嚟食, 事關冇食宵夜習慣嘅我, 要喺半夜食嘢好唔慣, gel 又唔係啲你會有craving 嘅食物. (噫家諗, 如果嗰時拍兩包gel 可能會好啲) 嗰時嘅體力, 唔知點上針草帽, 捱, 應該可以, 但咁快爆做咩呢? 深夜, 人嘅意志力特別低, 所以喺落到燒烤場前做損友, 問其他隊員做唔做逃兵. 成功氹掂隊員一齊閃, 個人鬆哂. 落到燒烤場, 享受成成的supoort, 啲飯團好好味. 仲見有人燒野食.... 零晨兩點燒野食??!!
女子組全軍覆沒. 最後只有joe, 傑, 同vic 繼續行程, hats off to them~~! 出城門時好在有的士入城門唔知咩村drop off 客, 所以唔駛行幾k出去揾的士, 真係注定要閃, 呵呵. 返到梳洗呢樣嗰樣上床時已經四點, 心諗唔知佢哋行到邊. 起身時check whatsapp 知佢哋安全完成. 好勁呀!
雖然都操咗27.9k, 可以交貨, 但故事又教訓我, 唔夠長課, 唔夠長課, 唔夠長課! 所以我決定今個星期開始, 每星期要跑一次長課 (<咳嗽聲> 我嘅長課係20k). 如果唔係都唔知爛頭2peaks 同雷利點屎.
下次大操會喺爛頭2 Peaks 喇.
|
|