|
|
《超越挑戰三項鐵人賽》9.27
期待已久既第一個三鐵比賽終於來臨~~
比賽前一晚,沒有緊張,只有興奮,2200上床,唔駛一陣就訓著,鬧鐘一晌,已經係第朝既0400啦~~
懶左幾分鐘床,就起身沖涼同梳洗 ,早晨係合桃蛋糕+朱古力奶,飲左兩大杯水,阿芝阿咗都要搞到0505-0510至出門...
去大埔兜埋奇哥,估唔到佢仲早過我...已經等左我幾個字...真係sorry...
過埋科學園都只係大約0550,天都未光就到左比賽場地~~
咁早到既參賽者唔多,工作人員忙於準備比賽設施,個天只係少少光,感覺非常好~~
一去到第一件事就攞比賽包,唔駛排隊,仲有幾位靚靚妹妹幫我劃手劃腳劃比賽號碼,感覺好幸福~~
跟住就去攞車,準備轉項物品,話晒新人,有時都少少lehe,奇哥又幫下手咁,都算順利...
沒耐就見到一位師兄話攞唔到比賽包(唔記得左係邊位),跟住又見到Rockie 兄,Rockie 兄話長跑網個booth 無人,但係其他ching ctse 既比賽包就晌果度,於是我地就走過去睇睇~~
又沒耐北區孖寶Loud 兄同Kopo 兄都到左,我地就晌booth 附近拉下筋,又走黎走去咁,中途又撞到D 師兄,又撞到好少見既舊同事,眨下眼就七點幾啦~~
就快埋去briefing,我就同Loud 兄番去轉項區攞野,我就隊埋平兄士邦唦既拋娃蕉,之前已經飲左好多水,食完再飲多三分一支,埋下左一個危機...
正當我地開始行去講解區時,heat 1 既健兒已經衝到黎轉項區,第一位唔識,第二位係李致和,第三四五六七位都唔識...
去到講解區,又遇到好多位師兄,大家吹吹水,聽完講解又吹水,好似cocktail party...
呢個時候另一位攝影師Maymay 同佢既愛人壞人兄有到左啦~~
Loud 兄唔知幾時跳左落海,跟住又叫我落去試試水,我就又跳左落去...感覺非常好,水溫唔冷唔熱,水好清,係浪大少少,不過我覺得更好feel~~
上番水又吹一陣就聽到有人嗌起步,我就拿拿林行過去~~
落到水氣氛好好,大家都熱切期待比賽正式開始,我晌Loud 兄後面,打個招呼就一齊等開始~~
唔記得咩聲一嚮,百幾位健兒就浩浩蕩蕩咁向前游呀游,Loud 兄驚小弟未訓醒,一起步就兜頭撐左我一野,當堂醒晒~~
人太多啦,你一肘,我一腳,大家不斷咁鋤 ,不過大家都係存心比賽,無意傷害別人,所以都無咩大問題~~
我自由式比較差,不過都湊熱鬧游左一段自由式,跟住試試游番自己比較熟練既蛙式,咦?同身邊游自由式既健兒速度差不多咋喎,就繼續游蛙式啦~~
由於游蛙式視線比較好,全程都攞到好線,過浮標時都貼住過,線路一D 都無蝕,速度亦保持到,感覺比其他選手仲偏快添,好快就游到岸邊上岸~~
因為海上既浮力影響,上水腳一腳軟,好在工作人員扶一扶,可能比賽令個人比較抗奮,上水幾步就已經適應到,即刻就跑上樓梯向轉項區進發~~
睇時間11:49,喜出望外,平時練最快都要13:xx
上到地面見到幾支鏡頭隊住,所以有D 笑容,仲聽到壞人兄大叫"見到肚腩呀!",即刻收番埋...
去到轉項區,用自己以為好快既速度著衫,戴帽...沒耐發覺十三哥晌身邊,都唔得閒打招呼,又有個疑似工作人員走黎幫我攞車,有無搞錯呀,乜唔係乜都自己搞架咩?? 我都唔理啦,搞掂就晌佢手上攞車走,希望唔會搞到我DQF 啦~~
推到部車出去上車,都好順利,晌整個轉項區用左5:46,慢左D,而肌肉就非常適應,就開始單車段啦~~
問題黎左啦...之前飲水太多,呢個時候竟然...急尿呀,仲係幾急下果隻,唔理啦,因間轉完項會經過廁所,到時至算啦~~
第一個圈快左,只係用左8:33,跟住都係九分幾.過左第三個圈,諗諗下,因間轉項時咁多人望住跑去廁所咪仲怪相?! 於是未到第四圈去左創新路個廁所...
我估前後sai 左兩分幾鐘,不過解決完又真係幾舒服...
果個圈就用左十一分幾,總共用左57分鐘去到落車線,比預計多左3min,全程唔太辛苦,但又加唔到力...還可以啦~~
去到落車位又見到Maymay,壞人同傑兄影相...做長跑網會員真幸福~~
其實全程車都幾無癮,有時有D 靚車fum 一聲晌身邊過...我係慢o者,都沒理由快我咁多架...
不過遇到D MTB 就有番D 安慰,好靚既MTB 都要俾我部爛鬼RB 過,有時仲可以同D C+RB 拍下,都好過齋俾人過啦...
單車時間如下:
1 - 8:33
2 - 9:07
3 - 9:33
4 - 11:30 (連沖廁)
5 - 8:56
6 - 9:35
去到轉項區,聽到Schnix 嗌我,一邊轉項一邊都同Schnix 傾左幾句,就興奮地向我最熟識既一項出發--跑!
就到跑步起點時見到屈老大,見到自己友心情特別好,跑都跑得快D~~
去到起點禁錶,呢次晌轉項區留左4:16,開始最後5k 跑~~
之前自己未練過轉項,一開始跑覺得自己跑得好慢,聽前輩講係正常既,但都想跑快D,不過對腳仔未係好回到,少少作老抽,又要快又要避免老抽,不斷咁調整~~
去到B 線轉折點,即係1K 位望望錶...真係快左,3:45咋,聽講唔係好夠秤,不過都係快丫,我之前預玩完個幾鐘,keep 5' 之內1k 已經收貨.
可能三鐵人相對操跑比較少,晌跑步只有我過人,收復番少少單車失去既時間,去轉折點 10:48~~
回程跑順左仲更加舒服,全程只有過人...從來未試過跑比賽咁有快感,last 100 都扮晒野衝下,回程10:43,5K 21:32,聽講全程都唔夠秤,不過點都比預期快~~
過左終點,又見到壞人,Maymay 同奇哥,影相,好開心,就咁樣完成左我第一個三鐵,自己只錶時間係1:40:43,好滿意啦~~
我既比賽結束左,party 未結束,我知道馬王果組上緊水,就晌終點附近等埋馬王上水,等左一兩分鐘就見到馬王,同佢打打氣,就開始行番去收拾自己既野,行行下又聽到瘋瘋嗌我,好熱鬧呀~~
跟住走去收拾一下自己既野,再去番長跑網既booth, 見到好多熟識既面孔,真係好舒服,不停吹吹吹,話題說不完~~
睇睇時間馬王又差不多踩完單車,又走左去八卦,去左停車區等佢,之後追去轉項區,再追去賽跑區...最後再番去終點搵佢,原來唔係自己比賽都可以咁好玩~~
之後又繼續party, 同你傾幾句,同佢傾幾句,又走去搵小偶像簽名影相,差不多十二點,終於頂唔順要去食野啦,只好同各位師兄師姐道別~~
最後同北區三寶,十三哥,Schnix同兩位馬王妹去左大快樂食野,又吹到天昏地暗,夠晒鐘至懷住依依不捨既心情歸家~~
好多年前已經覺得三鐵好好玩同好型,尤其見到小偶像(和爺)既出色表現就更加有興趣,不過無門路去玩,今年一月一認識Loud 兄知道佢係三鐵人就即刻捉住佢黎問,加上咁o岩北區朋友同其他長跑網朋友好多都有興趣,又遇著呢個咁o岩新人玩既比賽,真係估唔到咁快就可以完成一個三鐵,而且仲玩得咁開心~~
講番個比賽,我賽前既預計最好時間係1:40,最差希望順利完成都好啦,而家就o岩o岩上限完成,好滿意呀!! 比賽完開心到而家~~
分段既時間如下:
游水 500m : 11:49
1st 轉項區 : 5:46
單車 27km : 8:33/9:07/9:33/11:30/8:56/9:35 = 57min
2st 轉項區 : 4:16
跑 5km : 10:48/10:43 = 21:32
Total 1:40:43
多謝各位一齊比賽既長跑網隊友仔,攝影師,義工,送俾大家一個快樂滿足既比賽~~
[ 本帖最後由 花子阿DEE 於 2009-9-29 09:36 編輯 ] |
|
樓主
發表於 2009-9-28 20:06:52
Dee Ching,
發表於 2009-9-29 08:55:33
