本帖最後由 dmy 於 2013-6-4 23:59 編輯
06/02 - 家鄉的第一隻半馬
以前喺多倫多時都有喺跑步機跑步, 但係認真跑都係呢幾年嘅事. 今次回鄉探親, 知道尼加拉瓜大瀑布有個女子半馬比賽, 又好耐冇去過 Niagara Falls (一個移民家庭平均去過起碼十次, 因為要招呼親朋好友), 咁就一於參加, 順帶家人去玩, 打算之後再去美國outlet shopping. 話係女子比賽, 男子也可參加, 但係冇prizes. 見大部分都係女子跑手. 比賽前一日攞跑手包, 有一支酒 (尼加拉瓜大瀑布是紅/白酒產區), 呢樣個樣, 因為係女子比賽, 件tee 係women styling n cutting, 所以係難得嘅啱身.
好耐冇去瀑布, 又想住得喺起步地點近啲, 就book 咗間五星酒店, 對正個瀑布, 又離比賽地點4 公里.....但係可能呢幾年喺asia 俾啲酒店寵壞, 見到呢間酒店房, 五星價錢, 三星設備.... 我諗最貴都係個景... 呢間酒店喺曼谷嘅同chain 酒店正得多囉.. 算, 同屋企人出嚟玩唔計較咁多.
比賽當日, 多雲, 涼, 正係跑步最正嘅天氣, 仲驚落雨, 唔知帶唔帶太陽眼鏡好. 第一次開車去比賽, 唔駛check 行李, 真好, 啲嘢留喺車, 真方便! 大會七點開始播音樂, 個mc 又搞氣氛, 播gagnum style (@_@), 個mc 叫啲跑手一齊跳騎馬舞, 啲跑手又一齊跟佢跳~~!! 唔知係咪得我一個覺得搞笑!
比賽有起跑分區, 仲有race bunny. 有當地中學生個band 奏樂, 起步前有要唱國歌. Katheirne Switzer 做嘉賓, 起跑前仲落去起跑區同跑手擁抱, 因企得前, 我有幸同佢擁抱過, 不過佢讀錯我個名. (唔知 Katherine Switzer 係邊個? 大家google 吓啦).
起跑時我天真的企喺我預計時間, 只有十來人, 我心諗咁奇? 啲鬼妹點會跑咁慢? 後來先知 lai 嘢. 原來企喺我附近啲係超快腳, 我同佢哋起步跑咗2k 再睇錶, 見自己四分幾一k, 嚇死, 再調較番個pacing, 但已經開壞頭, 啲乳酸已經build up. 喺3k 之後啲跑手先追哂上嚟, 原來佢哋係怕俾啲快腳帶快..... 唉, 後來11-18k 好難捱. 11-13k 仲出太陽. 15k左右頂唔住行咗200m, 喺16-17k左右, 個心好想行幾步, 但見到 2:00 嘅race bunny 跑到喺隔離, 我心諗, 如果追唔上佢, 咁咪連sub 2 都做唔到, 咁就史都史埋佢. 條路線其本係平嘅, 本來仲諗住希望可以做好成績, 噫家連sub2 都唔知得唔得. 因為個bib number 有自己個名, 一路都有spectators 同跑手, 唔識都會叫你名支持你, 本來我以為係gimmick, 但原來有人叫自己名, 都有鼓勵嘅作用架, 由其喺最後300米衝線時, 好鼓舞. 最後 1:59:13 完成. 大會仲出動當地消防員喺終點送medal 俾跑手..... 不過佢哋身型唔係好 '烈火雄心'囉...
跑完, 大會送上水, 電解飲品, 朱古力奶, snack box (有蕉, 蘋果, 橙, 曲奇餅兩塊). 其實每2k 左右就有水站, 每個水站都有電解飲品 (藍色嘅~~~~~~), 喺10k 左右又有嘢食 (唔知有乜, 因我唔餓, 冇食), 所以跑完都冇話口喝同餓. 拉完筋就走.
本來對自己成績唔滿意, 但係呀cat 話得啱, 要enjoy 個過程. 咁難得封咗條路遠距離睇個瀑布, 一路風景又好, 之後又沿一條河跑, 唔望河就望吓啲屋, 見啲屋個front yard 超大 (不過要剷好多草), 條路線好好吖. 雖然封路, 啲人一啲都唔覺個比賽騷擾佢哋.
除咗個成績唔太滿意, 今次都玩得幾開心, 希望下次較啱時間回家正式跑次多倫多半馬.
半馬逹人dmy 包膠玩不
|